Раководството на Пелистер ја потврди информацијата дека Србинот Небојша Видиќ ќе го предводи овој тим до крајот на сезонава, како привремена замена за Марјан Илиевски, кој поради здравствени проблеми не е во можност да седи на клупата на битолчани.
Сепак, „пелистерци“ потенцираат дека Илиевски ќе се врати на кормилото за наредната сезона, за која тој има и валиден договор со клубот.
„КК Пелистер ја информира јавноста дека заради здравствените проблеми на тренерот Марјан Илиевски, принудена е да доведе нов привремен тренер на екипата. Српскиот стручњак Небојша Видиќ ќе го води тимот во плеј-офот. Тој веќе се запозна со екипата и го одработи првиот тренинг. Клубот потенцира дека, како што е предвидено и според договорот, Марјан Илиевски ќе се врати на подготовките и ќе ја води екипата во сезоната 2021/22. На тренерот Илиевски му посакуваме успешно заздравување, а на тренерот Видиќ успешна работа“, се вели во соопштението на битолскиот клуб.
Пелистер веќе в среда ја почнува полуфиналната серија од плејофот, на домашен терен против актуелниот шампион МЗТ Скопје.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
