Информацијата на ЕКИПА дека МЗТ Скопје искажал желба да го доведе Ијасу Ворку во своите редови за вториот дел од сезонава предизвика бура во домашната кошаркарска јавност. Така, најпрвин со реакција се јавија аеродромци, кои тврдат дека не преговарале за доведување на одличниот Американец како замена за Вер.
„МЗТ Скопје Аеродром ги демантира денешните неточни информации во јавноста за некаква си заинтересираност за Американецот Ијасу Ворку, кој ниту бил, ниту ќе биде наша трансфер-желба. Со ваквите шпекулации се нанесува штета не само на нашиот клуб и на екипата за која тој во моментов настапува, туку и на меѓусебните клупски односи, кои сакаме да бидат на највисоко ниво со сите останати прволигаши. Нашиот клуб немал, ниту ќе има потреба да ги „краде“ најдобри играчи на противниците, а ако во минатото имало вакви трансфери, тогаш тие не биле тајни и во вид на грабеж, туку биле остварени во соработка и преговори со клубовите од каде што ни доаѓале играчите“, објави актуелниот првак на Македонија.
ЕКИПА останува на ставот дека дошло до преговори меѓу двете страни, за што има потврда и од самиот кошаркар. Во прилог на нашето тврдење стигна и реакцијата на управата на КК Гостивар, која се пожали на „влијание од богати клубови со помош од општините“.
„КК Гостивар има потреба да објави свој став за се поголемото влијание на побогатите клубови, како и за неетичко и неспортско однесување надвор од спорстките терени. Имено, нашиот клуб се соочи со сериозен проблем каде што еден од најдобрите играчи во КК Гостивар и носител на играта на само еден ден од почетокот на тренинг подготовките за натпреварувачката сезона побара да си оди од клубот. Штетата и немаше да биде огромна, ако имаше можност за исправка, односно дополнение на испразнетото место, доколку воопшто и можеше да се најде било какво решение на таа позиција.
Знаејќи го фактот дека нема да можеме да најдеме замена, се реорганизиравме и успешно се справуваме половина шампионат со предизвикот во македонското првенство, со само еден единствен плајмејкер во целиот тим, нешто незамисливо во модерната кошарка. За тоа да не биде доволно , единствениот гореспомнат играч деновиве е мета на неколкумина агенти, пробувајќи да му влијаат на одлуката да ја промени средината, односно клубот, служејќи се со лаги , невистини и шпекулации за моменталната финансиска ситуација на клубот или пак за неговата големина и сериозноста во намерите.
КК Гостивар сака да изјави дека е меѓу ретките кошаркарски клубови во Македонија кој во моментов не води никаков спор или пак долгува финансиски средства на некој играч или тренер. КК Гостивар е меѓу ретките кои во екот на ковид годината ги исплати сите играчи и стручниот штаб. КК Гостивар и покрај сите опструкции е единствениот клуб кој исплати декемвриска плата за 2021 уште во декември. Сакаме да напоменеме дека буџетот испланиран за плати и трошоци за натпреварувачката 2021/22 е безусловно и целосно обезбеден уште на стартот од сезоната. За се ова да биде овозможено се грижат мал број на приватни спонзори кои заедно со управниот одбор на клубот, луѓе од градот кои сакаат да помогнат, веруваат и се залагаат за фер игра и однесување, а секако го очекуваат истото и од сите останати актери во Македонската кошарка.
Затоа замолуваме и апелираме до сите клубови кои силата ја имаат од огромните финансии во општинските средства, истите да ги насочат во што подобро претставување на меѓународна сцена и со тоа да покажат колку се големи и моќни. Ние ќе бидеме тука да ги подржиме и помогнеме бидејќи нивниот успех е успех на сите нас кои сме активни во кошарката во Македонија. Веруваме дека ваквите инциденти ќе бидат се помалку и изолирани, и дека сите заедно ќе можеме да се натпреваруваме спортски , етички и само на терен , а не и надвор од него“
Некој овде лаже, самите проценете за кого станува збор…
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
