Европската кошаркарска недела на Специјалната Олимпијада денеска беше одбележана и во нашата држава, со одржување на турнир во малата сала на „Кале“. Специјалната Олимпијада на Македонија организираше кошаркарски турнир, поддржан од Македонската кошаркарска федерација и кошаркарскиот клуб Вардар, на кој настапија кошаркари и кошаркарки со пречки во развојот кои докажаа дека љубовта кон спортот со портокаловата топка е иста кај сите луѓе. Целта на Специјалната Олимпијада е инклузија на атлетите со пречки во развој во општеството како еднакви.
„Чест ми е што одново сме поддржувачи на ваков настан и се надевам дека таквите ќе продолжат да се организираат и во иднина. Се уште свежо во сеќавање на сите ни стои настапот на овие талентирани кошаркари на турнирот „3х3“ кој се одржа во Скопје, а утре ќе можете да ги погледнете кошаркарите од Специјалната Олимпијада на полувремето од претквалификацискиот натпревар нашите сениорски репрезентативци. Верувам дека ќе уживаме во одлични игри денес на паркетот“ – го отвори кошаркарскиот турнир Генералниот Секретар на Македонската кошаркарска федерација, Моника Гаврилоска.
Турнирот започна во 10:00 часот наутро и траеше до 16:00 часот. Натпреварот на кој ќе настапат одличните кошаркари и кошаркарки од Специјалната Олимпијада, помеѓу Македонија и Швајцарија, ќе се одигра утре (недела, 26. ноември) со почеток во 10.45 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
