Бразилскиот интернационалец Вилијан Лира кој само пред неколку дена пристигна во Вардар, на својот прв настап во дресот на најтрофејниот македонски клуб постигна два гола во триумфот над Работнички од 6-0.
Лира вели дека е среќен поради двата гола, и пред сè поради победата на тимот на „тестот“ со Работнички.
„Секој играч посакува кога ќе дебитира за еден клуб, да почне со победа. Драго ми е што на мојот прв настап за Вардар, пред се, дојдовме до триумф, а исто така среќен сум што на мојот прв настап постигнав два гола. Се надевам дека ќе продолжам во ист стил и на следните официјални натпревари. И после потписот со Вардар реков дека на секој тренинг и на секој натпревар ќе дадам се од себе да се наметнам и да ја оправдам довербата со голови и со добри игри“ – вели Вилијан Лира во изјава за официјалната интернет страница на клубот.
Бразилецот неколку дена е со Вардар….
„Првите импресии ми се одлични. Добро сум примен од соиграчите и полека се вклопувам во новиот клуб. Се работи на професионално ниво, се бара секогаш доминација во играта, креирање шанси и се разбира секогаш да се атакува на победа. Драго ми е што станав дел од овој клуб, сега останува добро да се подготвиме за следните предизвици и секој да даде максимум за клубот да бележи успеси на сите полиња“ – вели бразилскиот напаѓач.
Освен Лира, свое деби на дуелот со Работнички имаа уште и Николас Херанц и Коста Манев кои што играа на стоперските позиции во вториот дел од средбата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
