Македонија сезонава добива свој фудбалер и во најсилната француска Лига 1, откако кадетскиот репрезентативец Агон Елези денеска потпиша договор со прволигашот Каен.
16-годишниот Елези, кој изминатава сезона настапуваше за Шкупи, потпиша четиригодишен договор со Каен, стартувајќи на тој начин своја интернационална кариера.
„Ја одбравме најдобрата фудбалска средина за Елези. И покрај понудите од Олимпијакос, Луго, ПАОК и Нант, сепак се одлучивме кариерата да ја продолжи во Каен каде добива одлични услови за свој фудбалски развој“ – вели менаџерот на Елези, Исак Арифи Ковачи, кој заедно со својот партнер Блерим Садиковски, го реализираа трансферот на младиот фудбалер.
Елези, кој е играч од средниот ред, во моментов е незаменлив член и на младата репрезентација на Македонија за играчи до 17 години.
Агон Елези ќе биде единствениот македонски фудбалер кој во моментов игра во Франција, во Лига 1. Во Втората лига во Франција, во редовите на Куевил Руен настапува потенцијалниот младински репрезентативец Калвин Н’Сомбо.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА