Македонската женска кошаркарска репрезентација со пораз ги стартуваше квалификациите за пласман на Европското првенство 2025. Во првиот натпревар од Групата Г, Македонија загуби на гостувањето од Португалија со 65-52 (14-10, 20-17, 13-18, 18-7), само поради крајно лошо одиграната последна четвртина во која беа постигнати само 7 поени.
Португалките подобри ги почнаа првите две четвртини од натпреварот, главно со подобра игра во одбраната доаѓајќи на полувремето до предност од 34-27.
Но избраничките на Ашаданов одлично го одиграа третиот период од играта дозволувајќи им на противничките само 13 поени. Македонија во третата четвртина дојде и до целосен пресврт со предност и од 42-45, но Португалките во финишот на овој период со серија 5-0 дојдоа повторно до предност.
Кога се чинеше дека на сличен начин Македонките ќе продолжат и во последната четвртина, неочекувано драстичен пад во играта кај македонските репрезентативки кои постигнаа едвај 7 поени во последните 10 минути, за пораз од 65-52.
Македонската селекција ја носеа на грбот три кошаркарки. Анџелика Митрашиновиќ беше најефикасна со 17 поени, дополнети и со пет асистенции, Мерит Хемпе заврши со 16 поени и седум скока, а Ирина Селцова заврши со 15 поени. Преостанатите четири поени за Македонија ги постигнаа Тасевска (2 поени) и Кметовска (2 поени).
Кај Португалките најефикасна беше Кореа со 15 поени, а Робало заврши со 13 постигнати поени.
Во првиот натпревар од групата Србија сосема очекувано убедливо славеше против Украина со 82-40.
Македонија во второто коло во Скопје ја пречекува Србија во недела (12. ноември) од 18 часот, а Португалија ќе гостува против Украина која како домаќин ќе игра во Рига, Летонија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
