Двајца од македонските тенисери го завршија настапот на Челинџерот Macedonian Open 2025 во првото коло од квалификациите откако ги загубија мечевите по три сета игра. Обрад Марковски и Берк Бугариќ загубија од своите ривали со 2-1 во сетови во мечеви што траеа по два и повеќе часа игра.
Прв на Централниот терен се појави Обрад Марковски против првиот носител од квалификациите Даниел Михалски од Полска. Првиот сет му припадна Михалски со 6:3 во гемови откако поведе со 1:0 со брејк, а Марковски изедначи на 2:2 со брејк. До крајот на сетот тенисерот од Полска имаше два брејка во седмиот и во деветтиот гем. Во вториот сет комплетна доминација на Марковски и со 6:0 и три брејка го доби сетот и изедначи на 1-1 во сетови. Иако резултатски убедливо овој сет траеше најдолго 49 минути. Во решавачкиот сет по 1:1 во гемови, Михалски успеа да направи два брејка во четвртиот и шестиот гем што беше доволно за да го добие сетот со 6:1 во гемови и мечот со 2-1 во сетови.
Берк Бугариќ имаше одличне старт во мечот со Неил Обрелајтнер (лански четвртфиналист) и го доби првиот сет со 6:3 во гемови пред се на брејкот направен во вториот гем и потоа водството од 3:0 го зачува до крајот и го доби сетот со 6:3 во гемови. Во вториот сет противикот направи брејк во вториот гем од сетот за водство од 2:0, а потоа имаше уште еден брејк за 5:1. Но, Бугариќ со ри-брејк возврати и стигна до 5:3, но немаше сили за пресврт и сетот заврши со 6:3. Во решавачкиот сет на стартот имаше по еден брејк и нерешено беше до 4:4. Во деветтиот гем Бугариќ го загуби сервисот и ривалот дојде до предност што му овозможи да поведе и потоа сетот да го заврши со 6:4 во гемови.
Од македонските тенисери во првото коло од квалификациите играат уште Стефан Мицов против Жерар Кампана Ли и Амар Хусеиновиќ против Фермин Фатиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
