Фудбалерите на Милан не успеаја да му подарат на својот тренер Стефано Пиоли победа на последниот меч на клупата на „росонерите“ откако фаворитот одигра само 3-3 на домашен терен против веќе испаднатата Салернитана.
„Црвено-црните“ имаа два гола предност, од 2-0 и од 3-1, но падот на концентрацијата во финишот овозможи гостите да се вратат и да ја расипат позитивната атмосфера што владееше од самиот почеток на „Сан Сиро“.
Леао го постигна првиот гол за Милан и веднаш истрча до Пиоли посветувајќи му го голот на тренерот со кого мина толку прекрасни моменти и го освои скудетото пред две сезони. На 2-0 зголеми Жиру, кој со гол се збогуваше од навивачите, ако се знае дека летово си заминува од Милан и кариерата ќе ја продолжи во американската МЛС-лига.
Салернитана намали на 2-1, но домаќините експресно одговорија и преку Калабрија ја вратија предноста од два гола. И кога се чинеше дека предноста ќе биде рутински задржана, гостите изненадија со два брзи гола, преку Самбија во 87. минута и Сими во 89. минута.
Милан ја заврши оваа натпреварувачка сезона на второто место со 75 освоени бода, четири повеќе од третопласираниот Јувентус.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
