Може ли МЗТ да се фати за сламка на спасот?

Кошаркарите на МЗТ Скопје вечерва (20 часот) му гостуваат на тимот на Мега Бемакс, во очајнички обид да си ги зголемат шансите за бегство од дното на табелата во АБА-лигата. Македонскиот првак моментно се наоѓа на последното место со три победи и 14 порази на своето салдо, а на претпоследната позиција е токму Мега со скор 5-12. На пет кола до крајот јасно е дека овој дуел е „сламка на спасот“ за „металците“, да си ги задржат шансите во битката за опстанок.

Проблем повеќе за тренерот Лукајиќ е што Марко Симоновски повторно се наоѓа на листата на повредени играчи, а стратегот на МЗТ Скопје веќе извесно време не може да смета ниту на Дарко Соколов.

„Играме против силен тим, кој е многу поквалитетен од тоа што покажува пласманот на табелата. И понатаму имаме проблеми со повредени кошаркари, нешто на што веќе навикнавме. За нас најважно е да одиграме според зацртаните принципи и да покажеме дека влегуваме во ритамот кој го посакуваме. Агресивноста во одбраната ќе ни биде неопходна, особено поради начинот на кој игра Мега Бемакс. На нас е да дадеме сѐод себе и ќе пробаме да покажеме квалитет со кој ќе може да му парираме на одличниот домаќин“ – истакна Лукајиќ во пресрет на овој дуел.

Во првиот дуел сезонава меѓу овие два тима Мега бемакс како гостин триумфираше во Скопје со 76-92.

Се вчитува...