Актуелниот првак на Македонија, МЗТ Скопје пред неколку дена остана без услугите на кондицискиот тренер Михаило Шејкероски кој се врати во редовите на бугарскиот гигант Левски, а денеска клубот ја објави соработка со Кристијан Кајчевски.
Селекторот на националната атлетска репрезентација е еден од најдобрите во својата струка во Македонија, а во текот на летото беше задолжен и за подготвка на новиот прволигаш Ангели.
„Поранешниот македонски репрезентативец во традиционално карате и актуелен селектор на атлетската национална селекција, Кристијан Кајчевски, е новиот кондициски тренер на МЗТ Скопје Аеродром, кој во иднина ќе биде задолжен за физичката подготовка на нашите кошаркар.
Станува збор за еден од најдобрите во својата професија во Македонија, кој изминативе години соработуваше со повеќе клубови во разни спортови, како и со кошаркарските репрезентации во повеќе возрасни категории. Тој воедно работи индивидуално со спортисти од сите профили со цел да придонесе за нивниот напредок во делот на експлозивноста, силата, координацијата и кондицијата.
Популарниот Кајче, кој воедно е и професор во ДСУ „Методија Митевски-Брицо“, во следниот период целосно ќе им се посвети на потребите на кошаркарите на МЗТ Скопје Аеродром, со цел да ги подобри нивните перформанси и да го извлече максимумот од секој поединец. Тренерот Дарко Радуловиќ со аквизицијата на Кајчевски во стручниот штаб добива докажан и признат професионалец, кој дефинитивно ќе ги крене стандардите на работата и ќе придонесе во обидот да се остварат најдобрите можни резултати на домашна и меѓународна сцена“, стои во соопштението на клубот од Аеродром.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
