По вчерашната потврда за останувањето на браќата Дамјан и Војдан Стојановски и на Андреј Андоноски во сино-белиот дрес за следната сезона, денеска МЗТ Скопје со информација за подмладување на тимот со двајца супер-талентирани кошаркари, кои се иднина на македонската кошарка.
Нови членови на МЗТ Скопје се Марко Миловановиќ (21 год, 196 см)) и Марин Петков (20 год, 193 см).
„Очекуваме да внесат полетност и елан во играта на гордоста на Аеродром. Двајцата се во подолгорочните планови на нашиот стручен штаб, но не само како перспектива, туку и како кошаркари кои веднаш по доаѓањето ќе дадат значаен придонес на патот кон одбрана на двојната домашна круна и кон враќањето во јадранската елита. Нивниот ангажман е потврда на заложбите на управата на клубот за подмладување со проверени млади кошаркари, кои веќе покажале доволен квалитет за настап на највисоко ниво, но кои уште повеќе може да се надградуваат и да напредуваат“ – порачуваат од МЗТ Скопје Аеродром.
Миловановиќ успешно ги мина сите младински селекции на Македонија, веќе има повик за настап и во најдобриот состав на жолто-црвените. Во МЗТ Скопје доаѓа од Италија, каде што изминативе четири сезони настапуваше за тимот на Јуви од Кремона.
Петков, пак, доаѓа од таборот на Феникс, каде што изминативе две сезони имаше голема прволигашка минутажа, која максимално ја искористи, а претходно една сезона беше дел од Вардар. И тој настапуваше за сите македонски младински репрезентации, а летово е на поширокиот список на селекторот на сениорите, Александар Јончевски, за претквалификациите за ЛОИ 2024 во Париз.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
