МЗТ Скопје во рамките од седмото коло стигна до шестата победа во домашното првенство, декласирајќи го на гостински терен составот на Ангели со убедливи 40 поени разлика (77-117). „Фенерџијата“ на табелата немаше никакви шанси за изненадување бидејќи „металците“ одиграа беспрекорно, продолжуваќи со серијата добри игри од вториот „балон“ во АБА2-лигата.
Домашниот состав парираше помалку од една четвртина, првиот период заврши со водство на МЗТ од 17-21, за „сино-белите“ потоа да издоминираат во нападот во вториот дел од мечот, на одмор заминувајќи со предност од 14 поени (38-52). Избраниците на тренерот Радуловиќ продолжија со ефикасна игра до самиот крај, во третата четвртина постигнаа 34, а во последната 31 поен, за најубедлива победа на актуелниот првак од стартот на сезонава.
Мекиќ со 19 и Дамјан Стојановски со 17 поени беа најефикасни во домашниот состав, додека прв стрелец на КК Ангели беше Мандерсон, кој оствари дабл-дабл од 25 поени и 10 скокови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
