Македонскиот ракометен вицешампион Еурофарм Пелистер и официјално останува уште без двајца ракометари за следната сезона. По Рение Табоада, клубот од Битола го напуштаат и младиот Матео Мараш, како и искусниот српски бек Немања Обрадовиќ кои кариерата ќе ја продолжат во унгарска Татабања.
Унгарскиот клуб денеска ги потврди трансферите на на овие двајца ракометари. Матео Мараш вели дека овој тим е идеален за неговото развивање.
„Многу сум среќен што потпишав за Татабања. Имам зацртано многу амбициозни планови и врз основа на тоа мислам дека доаѓам на совршено место што се однесува за мојот развој“, рече Мараш.
Обрадовиќ вели дека голманот Секељи му кажал само убави зборови за клубот и унгарскиот ракомет.
„Секељи ми кажа многу позитивни работи за градот, клубот, лигата. Татабања не е далеку ниту од Србија и кога сè ќе се собере одлуката да се преселам тука не беше тешка. Мислам дека е совршено место за мене“, рече искуниот бек.
Договорени со Татабања веќе се и голманот Мартон Секели, како и најдобриот ракометар на битолчани, капитенот Јосип Периќ, a официјализацијата се очекува во следниот период.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА