Дресот со број „седум“ кој го носеше Василис Спанулис во Олимпијакос ќе биде повлечен од употреба од страна на пирејскиот клуб. Популарниот „Кил Бил“ 11 години настапуваше во „црвено-бело“, а остави голема трага, не само во клубот, туку и длабоко во европската кошарка.
Тој беше предводник на Олимпијакос до двете европски титули во 2012 и 2013 година кога настапуваше заедно со нашиот Перо Антиќ, а во шампионската сезона во 2013 година го освои и МВП признанието. Спанулис осум пати беше биран во идеалната петорка на Евролигата, а во 2022 година го доби и признанието „Легенда на Евролигата“.
Спанулис и ден денеска е најдобриот поентер и асистент на Олимпијакос во Евролигата со 3.552 поени и 1.363 асистенции.
Неговиот дрес ќе биде закачен на врвот на арената „Мир и пријателство“ по свечена церемонија која е закажана за 17. септември 2023 година. На тој начин 40-годишникот ќе стане единствениот во историјата на Олимпијакос кој добил ваква чест.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
