Македонскиот првак Шкендија во Естонија го има првиот предизвик во квалификациите за Лигата на шампионите. Утре во Талин тимот на Ќатип Османи го игра првиот меч против естонскиот шампион Номе Калју, а стратегот на тетовци вели дека противникот е добро анализиран и очекува позитивен епилог по првите 90 минути.
„Го анализиравме противникот и подготвени сме за првиот предизвик. Го респектираме Номе Калју, но свесни сме за сопствениот квалитет и веруваме во позитивен епилог. Естонскиот тим несомнено поседува квалитет, имаат одличен среден ред и посебно се опасни по левата страна. Посветени сме на нашето издание и очекуваме поволен резултат“, изјави тренерот Ќатип Османи.
Фудбалерите се максимално мотивирани да стартуваат победнички во новата европска авантура. Капитенот Арменд Алими вели дека Номе Калју заслужува респект, но се ќе зависи од играта на Шкендија.
„Натпреварите на европска сцена се секогаш потешки од оние во домашниот шампионат, но, сепак, квалитетот речиси секогаш пресудува. Мислам дека Шкендија е поквалитетен тим, максимално сме мотивирани и фокусирани и веруваме во успех“, истакна Арменд Алими.
Мечот меѓу Номе Калју и Шкендија ќе се одигра утре со почеток во 18 часот на стадионот „Кадриорг“, а главен судија ќе биде Доналд Робертсон од Шкотска.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
