Поради снежните врнежи во Струмица, фудбалерите на Академија Пандев почетокот на зимските подготовки денеска го означија во спортската сала „Парк“.
Како што информираше шефот на стручниот штаб, Југослав Тренчовски и утре ќе се тренира во сала а потоа подготовките на отворено ќе продолжат во вторник (8. јануари) по дводневниот одмор поради божиќните празници.
Според планот на стручниот штаб до 25. јануари тимот ќе работи во Струмица, а потоа се заминува во Анталија, Турција.
Веќе се закажани првите два тест дуели против две екипи од Бугарија, на 20. јануари со Беласица од Петрич и втората на 23. јануари со второлигашот Струмска слава. На подготовките во Турција планирани се уште пет контролни дуели.
Академија Пандев денеска официјално го промовираше и едно од своите засилувања во зимскиот преоден рок, крилниот офанзивец Стојанче Велинов.
„Нова година, нов предизвик. Желбата е со Академија Пандев да се избориме за европски настап оваа сезона. Верувам дека ќе му помогнам на тимот да ги реализира зацртаните амбиции“ – истакна Велинов по промоцијата во новиот дрес.
Како што е познато ново има кај „пандевци“ е и Кристијан Стојковски кој дојде од Шкупи, а по позајмицата во Тиквеш во тимот се врати и Мишев.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА