Вардар вечерва на домашен терен против Мешков Брест ќе го одигра последниот натпревар од групната фаза во Лигата на шампионите. Вардарци со победа ќе го осигураат шестото место во групата и за противник во осминафиналето ќе го имаат актуелниот шампион, германски Кил. Алушовски и на овој натпревар поради повреда нема да може да смета на првиот голман, Борко Ристовски и на Ловро Јотиќ. Сепак, и покрај отсуството на овие двајца клучни ракометари, тој е оптимист пред овој меч и верува дека со победа ќе успеат да го освојат шестото место во групата и во осминафиналето да одат на мегдан на актуелниот шампион Кил.
„За нас е последен во групната фаза од Лигата на шампионите сезонава. Важен натпревар за нас, и ако се биде според најавите би требало да бидеме на 6. место на табелата и би играле веројатно со Кил. За нас е најважно што треба да ја подигаме формата, да се докажуваме на секој натпревар. Она последното гостување во Украина не бевме на нивото на кое треба да сме. Можеби од објективни причини, бевме без неколкумина, но немаме оправдување. Очекувам во четврток машка и цврста борба што ќе ни даде поголми шанси Мешков сезонава го победи ПСЖ, играше нерешено и со Флензбург. Таму Сташ Скубе е лидер на екипата. Имаат 16 играчи на секоја позиција. Сериозен противник против кого треба сериозно да пристапиме. Оваа сезона ова 6. место би било заслужено, имавме неколку несреќно загубени натпревари, и кога ќе сумираме групна фаза треба да бидеме задоволни и да се спремите за осминафиналето“, вели Алушовски.
Ракометарот на „вардарци“, Мартин Карапалески вели дека доколку го затворат Скубе ќе завршат голем дел од работата.
„Мораме добро да одиграме. Треба добро да се внимава на Скубе, тој е нивниот мотор. Се оди преку него. Ако него го сопреме ќе биде полесно. Тој не знае нас, ние го знаеме него. Секој меч сезонава во Лигата на шампионите е различен, но подеднакво тежок. Ние играме добро, барем на последните натпревари во ЛШ, иако немавме многу среќата на некои од последните, или пак во последните моменти грешевме. Секако проблем е што во последно време не сме комплетни, па тоа малку ги пореметува нашите планови. Но, како оди сезоната се повеќе се воигруваме“, изјави Карапалески.
Натпреварот во СЦ „Јане Сандански“ во Скопје е закажан за во 18:45 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
