Фенербахче во последните години беше дел од самиот европски кошаркарски крем, но во последно време турскиот гигант се соочува со сериозни финансиски проблеми. Уште при новите претседателски избори и доаѓањето на Али Коч на чело на спортскиот колектив беа најавени проблеми и намалувања на буџетите на останатите секции освен фудбалската, а последните информации говорат за сериозни долгови од над сум милиони евра кон членовите на машкиот и женскиот кошаркарски колектив.
Ова го потврди и самиот Коч, кој не го крие разочарувањето што не бил во можност да го испочитува даденото ветување кон тренерот Жељко Обрадовиќ.
„Имавме проблеми со приливот на средства и не бев во можност да го исполнам ветувањето кон Обрадовиќ, дека кошаркарите и тренерите платите ќе ги земаат на време. Првата рата се поклопи со обврските кон Евролигата за билетите за Ф4 турнирт, старата управа ги немаше платено и ние моравме да ги насочиме парите таму. Ситуацијата полека се стабилизира, се надевам дека наскоро се ќе се врати во нормала“ – изјави Коч.
Барем засега претседателот на Фенер не најавува намалување на буџетот на кошаркарскиот колектив, но медиумите не ја отфрлаат можноста за такво нешто во иднина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
