Во насока на засилена промоција на фудбалската игра на домашната сцена, ЕКИПА со избор на најдобрите од секоја рунда натпревари од ПМФЛ. Покрај тимот на колото и најдобриот играч, ќе се обидеме да ви ги доближиме и сите најинтересни моменти од секое коло, низ една рекапитулација на настаните. Овој пат и со осврт на полусезоната 2020/2021.

======================================================================================

ТИМ НА ПОЛУСЕЗОНА 2020/2021

Македонскиот фудбал одбележа полусезона во Првата лига, повеќе или помалку, очекувана. Шкендија, согласно и квалитетите на составот со кој располага од почетокот, е лидер на табелата на патот кон нова шампионска круна. Иако, јасно е дека ќе има сериозна пречка и во пролетниот дел од шампионатот во составот на Шкупи, кој потфрли низ последните неколку кола од есента. Македонија ЃП и дефинитивно е тимот кој изненади многумина, но и тоа како има и капацитет и сила за европска битка, а Струга ТЛ на чело со Срѓан Захариевски и тоа како дејствуваше од „сенка“, но сосема заслужено е меѓу водечките четири екипи. „Вардарци“, пак, го извлекоа максимумот ако се знае ситуацијата во која се наоѓаат, а дефинитивно повеќе се очекуваше од Академија Пандев која со составот со кој располага и тоа како има потенцијал за многу повеќе од претпоследната позиција на табелата.

===========================================================================================

ИГРАЧ НА ПОЛУСЕЗОНАTA: Дембо Дарбо (Шкупи)

Гамбиецот од редовите на Шкупи, Дембо Дарбо дефинитивно ги освои симпатиите на македонската фудбалска јавност изминатава полусезона. Одигра извонредни 17 натпревари за чаирчани, притоа со 16 постигнати погодоци издвојувајќи се на врвот на листата на најдобрите стрелци, со два гола повеќе од второрангираниот Бесарт Ибраими од Шкендија. Дарбо е, без сомнение, најсилната алка на Шкупи која остава надеж за тимот во битката за шампионската круна до крајот на сезоната.

===================================================================================

ТРЕНЕР-ПРАГМАТИЧАР НА ПОЛУСЕЗОНАТА: Жикица Тасевски (Македонија ЃП)

Малку кој пред почетокот на сезоната очекуваше Македонија ЃП да ја види на делба на втората позиција на табелата во најквалитетната домашна лига. Но, „лавовите“ на клупата го имаат едно од најдобрите тренерски имиња кои ги има Македонија, Жикица Тасевски. Без сомнеж, Тасевски е тој кој создаде навистина респектабилен тим во Ѓорче Петров, склопи коцкички на искуство и младост без некои посебно звучни имиња во тимот, но креираше екипа која ја краси тимскиот дух на патот кон остварување на годинашните амбиции – место на европската сцена.

=======================================================================================

ГОЛ НА ПОЛУСЕЗОНАТА: Дарко Размоски (Беласица)

Беласица нема со што многу да се пофали од изминатава полусезона во Првата македонска фудбалска лига. Но, ете ќе остане запаметен погодок на Дарко Размоски од 13. коло кој запиша навистина маестрален погодок на натпреварот против Работнички во Струмица.

========================================================================================

ФОТО НА ПОЛУСЕЗОНАТА: Полека бе брат…., јас сум!