Македонскиот прволигаш Работнички спогодбено го раскина договорот со тренерот Ѓоре Јовановски. Согласно резултатите на тимот од стартот на сезоната, раководството на клубот договорно одлучи да ја прекине соработката со шефот на стручниот штаб.
„Имавме разговор со тренерот Ѓоре Јовановски и се согласивме спогодбено да го раскинеме договорот. Во фудбалот резултатите секогаш ги диктираат настаните, а Работнички има високи амбиции, кои во моментот се, за жал, над остварените резултати. Согласно ова, моравме да го раскинеме договорот со Ѓоре Јовановски. Би сакал да му се заблагодарам за соработката, се работи за врвен професионалец кој во периодот додека беше шеф на стручниот штаб уште еднаш ги потврди своите професионални и човечки квалитети. Минатата година успеа да го одведе тимот во квалификациите за Лигата на Европа и да ја исполни целта. Тој работеше вредно и напорно секој ден, максимално се посвети и на развојот на младинската школа, и му посакуваме се најдобро во понатамошната тренерска кариера“, изјави претседателот Драган Поповски за официјалниот сајт на клубот.
Работнички по девет одиграни кола во Првата фудбалска лига се наоѓа на шестата позиција на табелата со 11 освоени бода.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
