Македонските ракометни репрезентативци со вечерашниот дуел против Финска (20 часот, СЦ „Борис Трајковски“) го отвораат новиот квалификациски циклус, овојпат за место на ЕП 2022. „Црвено-жолтите“ најверојатно ќе го прекинат континуитетот од настапи на големите натпреварувања откако не добија вајлд-карта за настап на СП во Египет, но селекторот Брестовац е свесен дека е од огромно значење да се биде дел од наредното европско првенство, уште повеќе ако се знае дека групата е сосема поволна, бидејќи крај фаворитот Данска за ривали ги имаме уште и Финска и Швајцарија.
Финците важат за апсолутни аутсајдери во групата, а во Скопје доаѓаат дополнително ослабени поради неиграњето на најдобриот ракометар Ренберг, додека во нашиот табор ќе недостигаат Мартин Поповски, Марио Танкоски и Мартин Велковски, кои беа позитивни на Covid-19 тестирањата на почетокот од подготовките во Скопје.
Јасно е дека Македонија ќе ја има фаворитската улога, но селекторот Брестовац ги предупреди своите пулени дека никако не смеат да го потценат денешниот ривал.
„Верувам дека со максимален пристап и мотивирана и цврста игра во одбраната можеме да стигнеме до позитивен резултат во дуелот со Финска. Тие бележат евидентен напредок во играта на клубски и репрезентативен план, така да во ниеден момент несмееме да ги потцениме како состав. Имаат искусни и квалитетни ракометари во својот состав кои можат и знаат да одиграат добар ракомет“, изјави Брестовац.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
