Според многумина, најдобрата тенисерка на сите времиња Серена Вилијамс, денес беше поразена од Наоми Осака во полуфиналето на Австралија опен. После мечот, Серена не го напушти теренот веднаш, таа остана и мавташе долго пред публиката, која од денес се врати на Австралија опен, се поклони трипати пред трибините на Род Лејвер Арена, па отиде на прес-конференција каде и се расплака пред новинарите.
Она што следеше на прес-конференцијата по натпреварот беше логичното прашање дали станува збор за проштален поздрав и дали Американката го одигра последниот Австралија опен во својата кариера. Серена се обиде да избегне одговор на прашањето, но во тој момент заплака, а потоа стана и замина, по што не се врати.
„Ако некогаш се збогувам, нема да кажам никому“ – беше единственото што го рече големата шампионка откако се расплака.
Сето ова ќе предизвика уште повеќе приказни за нејзиното збогување, Серена има 39 години и логично е да размислува за одење во пензија. Спортската јавност е согласна со едно, а тоа е дека Вилијамс не мора повеќе да се докажува на никого, бидејќи таа е најдобрата тенисерка во светот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА