На Шкендија не и пречи лошиот терен на Могила во Прилеп, па успеа да си освои три бода, славејќи против Победа со 0-2. Со тоа ја зголеми предноста во однос на конкурентите. Ферхан Хасани во десеттата минута од пенал го отвори резултатот за тимот на Ќатип Османи, а Бесарт Ибраими во 90.минута го потврди триумфот. Победа од 83.минута играше со играч помалку поради исклучувањето на Дарко Илиески.
Вардар може да биде среќен што освои и бод, со ремито без голови, против Силекс во Кратово. Избраниците на Чедомир Јаневски повторно беа непрепознатливи, а кратовци пропуштија колосална шанса за триумф во 26.минута.
Филип Тимов не успеа да реализира пенал, откако стрелаше само во гредата од голот на Гачевски.
Работнички славеше и трета победа по ред. „Романтичарите“ на арената „Филип Втори“ го совладаа Шкупи со 1-0, со голот на Чарлс Гофри во 45.минута од средбата. Очигледно дека промената на тренерската клупа донесе позитивни ветришта во клубот од Дебар Маало.
Затоа пак трагично е во Пелистер. Нов пораз, овојпат на гостувањето против Скопје со 1-0. Мартин Ковачев во деветтата минута заработи црвен картон, а тоа го искористи Дарио Десниќ, кој во 36.минута ја затресе мрежата на битолскиот прволигаш.
Вчера, Ренова ја совлада Академија Пандев со 3-1.
ПРВА ЛИГА, 13.КОЛО – РЕЗУЛТАТИ
СИЛЕКС – ВАРДАР 0-0
ПОБЕДА – ШКЕНДИЈА 0-2
РАБОТНИЧКИ – ШКУПИ 1-0
СКОПЈЕ – ПЕЛИСТЕР 1-0
ВЧЕРА: РЕНОВА – АКАДЕМИЈА ПАНДЕВ 3-1
Табела: Шкендија 31, Академија Пандев 21 (-1), Вардар 20 (-2), Силекс 19, Ренова 17, Работнички 16 (-1), Шкупи 15, Пелистер 12, Победа 12, Скопје 9.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
