Актуелниот шампион Шкендија со три бода предност во однос на Вардар ја дочека репрезентативната пауза, но шампионската трка ќе продолжи до крајот на есента на теренот, но и потоа во зимскиот преоден рок. Клубот од Тетово планира да му зададе голем удар на Вардар со купување на двајца квалитетни странци. Напаѓачот Тигран Барсегјан одамна е „пазарен“ за Шкендија, а друштво треба да му прави и дефанзивецот Евгениј Новак. Тоа се желбите на тренерот на Шкендија, Ќатип Османи, кој со овие трансфери сака да оствари двојна добивка, да го засили својот тим, но и да го ослаби главниот конкурент за титулата.
Не е тајна дека во Вардар финансиите се проблем, а Тигран Барсегјан веќе подолг период нема право на настап затоа што не може да добие работна дозвола. Тој беше на чекор до Шкендија и пред почетокот на сезоната, дури падна и договор за негов трансфер, но во последен момент тоа беше одложено, и заминувањето остана нереализирано. Но, сега проблемите се уште поголеми, затоа Барсегјан не може да настапува, а Шкендија сака тоа да го искористи и да го купи квалитетниот Ерменец, кој би бил одлична замена за Бесарт Ибраими, кој мора да замине на операција на лигаментите на коленото.
Османи го посакува и Евгениј Новак како засилување за одбранбената линија. Шкендија е „тенка“ во дефанзивниот дел и оваа сезона e посебно ранлива. Украинецот би бил одлично решение за зацврстување на бедемот пред голот на Костадин Захов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА