Актуелниот првак Шкендија влезе во победничка серија и успеа да ја совлада и Беласица (0-2) на гостувањето во Струмица. Но, Вардар го задржа првото место на табелата со триумф (1-3) на гости кај Македонија ЃП. Работнички ја доби Победа со 3-1, Шкупи славеше со 1-0 против Академија Пандев, а Ренова и Силекс одиграа 1-1, во 12.коло од Првата фудбалска лига на Македонија.
Шкендија имаше повеќе од играта на стадионот „Младост“ и заслужено стигна до триумф од 0-2. Бесарт Ибраими имаше одлична шанса за отворање на резултатот по 20 минути, но се одлучи да солира наместо да асистира и шансата пропадна. Но, Изаир Емини донесе водство за гостите од Тетово во 28.минута. На почетокот од вториот дел, Енур Тотре во 49.минута зголеми на 0-2, а сите надежи на Беласица се угасија десет минути подоцна кога голманот Никола Вујанац заработи црвен картон.
Вардар во последните мигови дојде до победа (1-3) против Македонија ЃП. Дарко Мицевски во 90.минута постигна победнички гол, а Јован Попзлатанов во третата минута од судиското продолжение го потврди триумфот, за задржување на тимот на првата позиција на табелата.
„Црвено-црните“ поведоа во Ѓорче Петров со голот на Вилијан Лира во 19.минута, но возврати искусниот Боби Божиновски во 54.минута за израмнување.
Работнички оствари триумф (3-1) над Победа на арената „Филип Втори“. Стрелец на водечкиот гол беше прилепчанецот Николче Шаркоски, кој во 50.минута излезе сам пред Тофилоски и рутински стрелаше.
Во 80.минута, Чарлс Чинеду Гофри уште еднаш ја затресе мрежата на гостите. Петар Петковски во 88.минута зголеми на 3-0, а Чиназорм во следниот напад постигна почесен погодок за прилепчани.
Шкупи минимално ја совлада Академија Пандев на Чаир со 1-0. Виктор Ангелов во 75.минута донесе многу важни три бода за Шкупи.
Ренова и Силекс ремизираа (1-1) во Тетово. Кратовскиот тим имаше водство со голот на Дарко Алексовски во 67.минута, но Влатко Стојановски не дозволи пораз за Ренова. Напаѓачот на „гипсарите“ погоди во 78.минута.
ПРВА ЛИГА, 12.КОЛО – РЕЗУЛТАТИ
МАКЕДОНИЈА ЃП – ВАРДАР 1-3
БЕЛАСИЦА – ШКЕНДИЈА 0-2
РЕНОВА – СИЛЕКС 1-1
РАБОТНИЧКИ – ПОБЕДА 3-1
ШКУПИ – АКАДЕМИЈА ПАНДЕВ 1-0
Табела: Вардар 27, Шкендија 25, Академија Пандев 19, Работнички 17, Победа 14, Ренова 13, Македонија ЃП 13, Беласица 13, Шкупи 12, Силекс 11.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
