Кошаркарите на Шпанија се освојувачи на бронзените медали на Евробаскет 2017, откако „црвената фурија“ попладнево во малото финале рутински ја совлада селекцијата на Русија со резултат 93-85. Шпанците доминираа речиси целиот натпревар, па и покрај обидот на Русите за камбек во последниот период сепак избраниците на Скариоло го издржаа завршниот притисок и стигнаа до заслужена победа.
Уште од самиот почеток стана јасно дека шпанскиот состав е максимално мотивиран по фијаското против Словенија во полуфиналето. Шпанците набрзина презедоа контрола над резултат и веќе по пет минути игра поведоа со осум поени разлика (13-5). Првата четвртина заврши со резултат 21-13, а шпанскиот состав потоа стигна и до „плус седумнаесет“ во текот на вториот период. Русите не се предадоа, па во последната четвртина успеаја и да се вратат. Тие најпрвин дојдоа на само два поени разлика (78-76) со тројката на Зубков, а потоа при „минус четири“ Фридзон промаши отворен шут за тројка, по што Шпанија влезе во серија и рутински го приврши овој меч, до конечните 93-85.
Пау Гасол беше главна фигура со 26 поени и 10 скокови, Марк Гасол постигна 25 поени, а одличен беше и Серхио Родригез, реализирајќи 16 поени и 9 асистенции. Најефикасен кај Русија очекувано беше Алексеј Швед со 18 постигнати поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
