По репрезентативната пауза продолжуваат возбудавањата во Првата македонска фудбалска лига со натпреварите од 23. коло.
Фудбалерите на Силекс борбата за опстанок во елитното домашно натпреварување ќе ја продолжат со меч против актуелниот шампион и лидер на табелата тетовска Шкендија. Помошникот тренер во стручниот штаб на тимот од Кратово, Горан Симов, вели дека ги очекува меч против најдобриот тим во лигата на кој фудбалерите на Силекс немаат што да изгубат.
„Не очекува тежок натпревар против најсилниот тим во лигата. Ги анализиравме, иако нема што многу да се анализира бидејќи знаеме која е Шкендија и со каков квалитет располагаат. Ветувам дека моите фудбалери ќе дадат максимум и се надевам на поволен резултат“, вели Симов.
Во пролетниот дел од сезоната Силекс на пет натпревари има само еден пораз од Академија Пандев.
„Според мене можевме и повеќе во натпреварите, бидејќи три средби ги игравме на домашен терен. Со Шкупи ни недостигаше среќа. Водевме 2-0, за потоа со автогол и со гол примен во последните минути да загубиме два бода. Со Ренова не сум задоволен како одигравме, педесетина минути игравме со играч повеќе и не успеавме да ја материјализираме бројчаната предност. Со Победа исто не одигравме на ниво, но сепак трите бода се најважни“, дополнува Симов.
До крајот на сезоната „кратовчани“ ги очекува тешка борба за опстанок во Првата македонска фудбалска лига.
„Пролетниот дел ќе биде тежок. Моментално се наоѓаме на осмата позиција која води во баражот за опстанок во лигата. Пред нас е Македонија ЃП која има два бода повеќе. Ќе дадеме се од себе да ги поминеме на табелата и следната сезона повторно да бидеме дел од Првата лига“, заврши Симов.
Натпреварот меѓу Силекс и Шкендија во рамки на 23. коло во Првата македонска фудбалска лига на програмата е во четврток, со почеток во 14:30ч.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
