Финалната серија од кошаркарскиот шампионат меѓу МЗТ Скопје и Работнички наместо петок дефинитивно ќе стартува в сабота во СЦ „Јане Сандански“, беше одлучено на денешниот состанок на финалистите со претставниците на Министерството за Внатрешни Работи.
„Куќата на кошарката“ имаше предвидено и финалните како и претходно полуфиналните средби да се играат во распоред вторник – петок – недела, но проблемот настана поради фудбалскиот дуел меѓу Македонија и Полска, за кој ќе треба да бидат ангажирани дополнителни полициски сили.
Вториот дуел на кој домаќин ќе биде Работнички е закажан за вторник (11 јуни). Финалната серија се игра до три добиени натпревари, а евентуалната мајсторка би била на програмата на 18 јуни во СЦ „Јане Сандански“.
Работнички и МЗТ Скопје и лани се сретнаа во финалето од плејофот, при што „центарци“ славеа со максимални 3-0 во сетови и ја прекинаа доминацијата на „металците“ на домашната кошаркарска сцена.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
