Вториот интернационален камп на Реал Мадрид Фондацијата и официјaлно е отворен во Охрид. Добредојде на децата им посакаa носителот на лиценцата Влатко Тодев и менаџерот на Реал Мадрид Фондација, Карлос Касиљас Санчез.
„Драго ми е што сме овде во Македонија и што со нашите тренери од Мадрид, Хуан Андрес Гонзалес и Жоакин Валерио ќе ви пренесеме дел од фудбалското искуство кое ќе ви овозможи нови знаења. Ќе учиме фудбал, а секојдневно преку едукативните предавања ќе ги имплементираме и основните вредности кои се темел на работата на нашата Фондација. Тоа се лидерство, тимска и напорна работа, почит и самоконтрола“, изјави Санчез.
„Мадридистите“ се сместија во хотел “Аквалина”, подготвени за ново искуство. Тие ја добија и својата оригинална опрема од Реал Мадрид. Денот им започна со индивидуално и групно фотографирање, а според правилата на Фондацијата, беше одржано и првото предавање на тема – лидерство. На отворањето беше прочитано и писмо од општина Охрид во кое се изразува поддршката и реализација на визијата која кон овој камп ја даде прерано починатиот градоначалник Стојаноски.
Со тренинзи тимот на тренери од Шпанија стартуваше во попладневните часови, со традиционалните тест натпревари за согледување на квалитетот со кој располага секој кампер одделно. Децата се поделени во групи според возраста и според фудбалското искуство кое го поседуваат.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
