Стручниот штаб на Вардар е принуден да ги менува плановите за текот на подготовките по откажувањето на турнирот во Кањижа, на кој требаше да учествуваат и „црвено-црните“.
„Планираниот настап на турнирот во Кањижа, Србија кон крајот на месецов е откажан поради епидемиолошките состојби кај нашиот сосед. Таму беше планирано да настапи и Вардар 1961“, објави македонскиот првак на официјалната веб-страница.
Покрај Вардар, на истиот турнир требаше да играат и Нексе и ПИК Сегед. Сега по откажувањето на турнирот тренерот Стевче Алушовски ќе може да ја воигрува екипата единствено на турнирот во Струга што е планирано да се одржи од 12 до 16 август.
Истовремено Алушовски размислува и за договарање на уште неколку дополнителни контролни натпревари овој месец. На 29 август е планирано во Скопје да се одигра реванш четвртфиналниот натпревар од СЕХА Газпром лигата со Нексе. Тоа е заостанат меч од минатата сезона, а победникот од тој двомеч ќе игра на завршниот турнир на Ф4 планиран за почетокот на септември во Задар, Хрватска.
„Ние се подготвуваме и го очекуваме тој натпревар. Засега нема други најави и ја темпираме формата за тој натпревар и за Ф4 турнирот, вели Алушовски.
Екипата тренира во Скопје каде ќе остане се до заминувањето за Струга.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА