Претстојното Светско првенство што почнува за два дена во Германија и Данска ќе биде без една од најголемите ракометни ѕвезди – Никола Карабатиќ.
Операцијата на левото стапало го исфрли најдобриот светски рајкометар од комбинација за настап на Мундијалот. За Карабатиќ ова е прво големо натпреварување што ќе го пропушти откако настапува за француската репрезентација. За репрезентацијата на Франција Никола Карабатиќ дебитираше во 2002 година и оттогаш учествувал на сите европски и светски првенства и на Олимписките игри.
На средината на октомври Карабатиќ ја изненади јавноста со објавата на социјалните мрежи дека се наоѓа во болницапред операција. По оваа хируршка интервенција бекот на ПСЖ и на француската репрезентација ќе паузира најмалку четири до шест месеци.
„Болката беше пресилна. Тешко е и многу разочарувачко… Се обидов да стискам заби, но не беше доволно. Можев да ја влошам повредата и можеби, привремено да ја прекинам кариерата. Тажен сум бидејќи го пропуштам првото светско првенство во својата кариера, но друга можност немав“ – рече 34-годишниот бек на француската репрезентација.
Никола Карабатиќ е едно од најголемите ракометни имиња на сите времиња. Од 2002 година досега, за Франција има одиграно 289 натпревари и постигнато 1149 гола. Со „експертите“ ги освои сите најголеми титули во ракометот – две олимписки злата и едно сребро, четири злата и две бронзи на светски првенства и три златни и две бронзени медали на европските првенства.
Во својата клупска кариера, Никола Карабатиќ од 2015 година настапува за ПСЖ.
На СП во Германија и Данска, репрезентацијата на Феранција ќе игра во групата А со Германија, Русија, Србија, Бразил и Кореја.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА