Кошаркарите на ТФТ со пресврт во последниот период, остварија триумф на домашен терен со бугарскиот тим Берое, во последниот натпревар од групната фаза во БИБЛ Лигата, и така обезбедија пласман во следната фаза. Иако имаа негатива и од 11 разлика во еден период, сепак, со одличната партија во последната четвртина, остварија победа од седум разлика (95:88).
ТФТ имаше добар почеток на мечот, и брзо стигна до предност од пет разлика, која ја имаше и во средината на првиот дел, за на крајот да изнесува само два (20:18). Во втората четвртина пад во редовите на скопскиот тим, или подобро кажано Берое се разбуди, па не само што ја анулираше разликата, туку на полувреме замина и со предност од пет разлика, иако на моменти истата изнесуваше и 11.
Во третиот период ТФТ успеа да се врати, да дојде до „егал“, па дури и до предност, но со одличен финиш бугарскиот тим, сепак, влезе во последниот период со предност од пет (71:76).
Во последната четвртина целосен пресврт. Одлична серија на домашните за израмнување, а потоа и за водство. Предноста на ТФТ во еден момент беше и двоцифрена, 10 разлика (95:85), а на крајот Берое само намали на 95:88, што беше конечен резултат.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
