Раководството на Тотенхем работи напорно на засилување на тимот за наредната сезона, се со цел „спарси“ да бидат далеку покмпетитивни доколку успеат да обезбедат опстанок во Премиер-лигата.
Веќе се договорени деталите за соработка со левиот бек на Ливерпул, Енди Робертсон, а „спарси“ договорија уште еден важен трансфер, на Маркос Сенеси од редовите на Борнмут. Аргентинецот е слободен играч на крајот на летово, долго време се веруваше дека тој е веќе договорен со Јувентус, но ситуацијата се промени од почетокот на месецов, а Тотенхем експресно ги договори условите за овој одличен дефанзивец да му се приклучи на актуелниот освојувач на Лигата на Европа.
Договорите со Сенеси и со Робертсон сепак не се потпишани бидејќи се чека на решавањето на еден голем проблем – премиерлигашкиот статус на Тотенхем. Имено, „спарси“ во случај на испаѓање од Премиер-лигата ќе мора да го намалат сериозно буџетот за плати, што ќе значи и откажување на овие два слободни трансфери.
И Робертсон и Сенеси се согласиле да почекаат и до крајот на сезонава да не преговараат со други клубови, но јасно ставиле до знаење – ако Тотенхем испадне, тие немаат намера да играат во Чемпионшип-дивизијата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
