Работнички во рамките на 7. коло од Првата македонска фудбалска лига денеска од 15:30 часот го пречекува тимот на Академија Пандев, по подолг период конечно како домаќин на арената „Филип Втори“.
Поради презафатеноста на нашиот најголем стадион, „романтичарите“ и европските мечеви, а и досегашните натпревари од Првата лига ги играа на други стадиони, и сега конечно се создадени услови за враќање на „Филип Втори“. Тоа треба да биде еден поттик повеќе за четата на Виктор Треневски и за добра игра и позитивен резултат на мечот против Академија Пандев.
„Речиси пет месеци немаме играно на арената „Филип Втори“. Сега конечно се враќаме на нашиот најголем стадион, тоа е нашиот вистински дом и се надевам дека тоа ќе биде дополнителна мотивација за фудбалерите. По триумфот против Победа сега очекувам позитивен импулс да покажеме и на овој нареден меч. Академија Пандев е нов прволигаш, но веќе покажа дека е добро организиран клуб и дека има солиден состав. Сепак, ние сме насочени кон нашите сили и можности и верувам дека враќањето на „Филип Втори“ ќе го одбележиме со позитивен резултат“ – вели тренерот на „романтичарите“, Виктор Треневски.
Нигерискиот напаѓач Чарлс Чинеду Гофри, кој на мечот со Победа во Прилеп се запиша и меѓу стрелците, очекува „романтичарите“ да продолжат во истиот ритам.
„Остваривме триумф на минатиот меч во Прилеп, и се надевам дека во ист ритам ќе продолжиме и на денешниот меч. За мене ќе биде прво појавување на најголемиот стадион и се надевам дека ќе го паметам по убаво. Посакуваме нова победа, сите сме максимално фокусирани на тоа. За мене лично, ова е едно големо искуство, дојдов во Македонија да се наметнам со своите игри и да напредувам како фудбалер. Одлично сум прифатен во Работнички и верувам дека од натпревар во натпревар ќе играме се подобро, затоа што сепак е ова еден нов тим, на кој му треба малку време за да се воигра“, вели нигерискиот напаѓач.
Академија Пандев, пак, за Скопје отпатува со низа проблеми во играчкиот кадар. Атанасковски е суспендиран, Марков нема да игра поради повреда, а под голем знак прашалник се Дориев и Стоилов за чиј настап ќе се одлучува непосредно пред почетокот и конечниот збор ќе го има тренерот Панче Стојанов.
Главен судија на денешниот натпревар меѓу Работнички и Академија Пандев ќе биде Димитар Мечкаровски, а ќе му помагаат Дејан Неделкоски и Гоце Петревски од Скопје. Четврти судија е Дарко Стојчевски (Скопје). Делегат на овој натпревар е Гоце Шопоски (Струга), а за контролор на судењето е одреден Ванчо Костенчев (Скопје).
ПРВА ЛИГА – 7. КОЛО (денеска, 15:30 ч.)
Скопје: РАБОТНИЧКИ – АКАДЕМИЈА ПАНДЕВ
Битола: ПЕЛИСТЕР – ВАРДАР
Кратово: СИЛЕКС – ПОБЕДА
Скопје: СКОПЈЕ – ШКЕНДИЈА
ВЧЕРА
Тетово: РЕНОВА – ШКУПИ 0-0
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
