Голманот на Кил, Никлас Ландин, во интервју за данските медиуми обелодени дека сите членови на „зебрите“ се согласиле на намалување на платата во висина од 50% за да го спасат клубот од огромни финансиски проблеми. Германскиот гигант има значително намалени приходи поради играњето пред празни трибини и намалувањето на дел од спонзорските договори.
„Клубовите имаат огромни проблеми, но мислам дека Кил е еден од оние кои се најпогодени бидејќи вообичаено има најголеми приходи од домашните натпревари. Имавме намалени плати во последните четири месеци од ланската сезона, а воедно се договоривме и да играме за 50% помали плати во новата сезона. Чудно е да мора да се задоволиш со половина од платата што си ја договорил, но меѓу нас играчите владее огромно единство и сакаме да му помогнеме на клубот во овие тешки времиња“, истакна Ландин.
Според данските медиуми, Ландин во договор со Кил заработува околу 270.000 евра по сезона, а со намалувањето најдобриот голман на денешницата ќе мора да се задоволи само со 135.000 евра годишно или околу 11.000 евра месечна плата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
