Шампионот Вардар го загуби вториот меч во низа во Првата лига, откако доживеа пораз од Работнички во градското дерби со 3-1. Но, и Шкендија загуби на гости во Струмица од Академија Пандев со 3-2. Силекс со пресврт славеше во Битола против Пелистер со 1-2, а Ренова убедливо го совлада Скопје со 5-1. Шкупи оствари минимален триумф над Победа, 1-0.
Работнички поведе на дербито во 17.минута. Рашо центрираше од десната страна, а Серџо јуниор со волеј удар ја смести топката во мрежата на Гачевски. По примениот погодок, Вардар се обиде да возврати, но евидентен беше заморот кај фудбалерите на шампионот.
Чедомир Јаневски на полувремето ги уфрли во игра и Итало и Блажевски, но тие само се вклопија во сивилото на комплетниот тим.Демири заработи пенал за Вардар во 70.минута, а Дејан Блажевски го претвори во израмнување. Но, само три минути подоцна, пенал и за Работнички откако стрелецот Блажевски играше со рака во сопствениот шеснаесетник.
Остоја Стјепановиќ беше сигурен реализатор на пеналот, за ново водство за „романтичарите“. Во завршницата, Серџо јуниор на фантастичен начин го мина Демири и му подготви гол-ситуација на Миле Тодоров, а младиот играч на Работнички ја реализираше рутински со удар со глава.
Академија Пандев го совлада лидерот Шкендија во Струмица со 3-2. Домашните поведоа со 2-0, тимот на Ќатип Османи израмни на 2-2, но Константин Чешмеџиев во 90.минута донесе триумф за „академците“.
Зоран Балдовалиев во 24.минута го отвори резултатот, а Ѓорѓи Марков во 52.минута постигна и втор погодок за Академија Пандев. Но, Марјан Радески намали веќе во следниот напад, а Бесарт Ибраими во 71.минута донесе израмнување. Сепак, во 90.минута, Константин Чешмеџиев, со шут од 14 метри по корнерот од десната страна, донесе голем триумф за Академија Пандев.
Силекс со пресврт во второто полувреме освои три бода под „Тумбе кафе“, совладувајќи го Пелистер со 1-2. Лукас Кардосо во петтата минута донесе предност за битолскиот прволигаш, но Силекс возврати силно во вториот дел. Бобан Георгиев израмни во 67.минута, а Филип Тимов девет минути подоцна направи целосен пресврт.
Ренова го декласира Скопје со 5-1, иако се мачеше едно полувреме. Гостите од 33.минута играа со играч помалку поради исклучувањето на Ѓоко Алексовски, а „гипсарите“ тоа го искористија во вториот дел. Незири го постигна првиот гол за Ренова во 60.минута, потоа стрелаше Костов, а третиот гол беше дело на Лукас Маркос. До крајот, Љавдрим Скендери постигна два гола за Ренова, а Дарко Ѓурчиновски почесен погодок за Скопје.
На Чаир, Шкупи триумфираше против Победа со 1-0, со голот на Ален Јашаровски во 85.минута од средбата.
ПРВА ЛИГА, 12.КОЛО – РЕЗУЛТАТИ
РАБОТНИЧКИ – ВАРДАР 3-1
АКАДЕМИЈА ПАНДЕВ – ШКЕНДИЈА 3-2
ПЕЛИСТЕР – СИЛЕКС 1-2
РЕНОВА – СКОПЈЕ 5-1
ШКУПИ – ПОБЕДА 1-0
Табела: Шкендија 28, Академија Пандев 21 (-1), Вардар 19 (-2), Силекс 18, Шкупи 15, Ренова 14, Работнички 13, Пелистер 12, Победа 12, Скопје 6.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
