Вардар ја продолжува победничката серија во регионалната СЕХА лига. „Црвено-црните“ на домашен терен го победија Нексе со 37-29 во 16. натпревар во СЕХА, прв по зимската пауза во ова регионално натпреварување. За вардарци ова 13 победа со која се зацврстуваат на лидерската позиција на табелата.
Паузата со репрезентативните настапи на СП во Франција, не го наруши ритамот на вардарци. Уште на стартот избраницте на Раул Гонзалес поведоа со 3-0 што беше само најава за новата победа на македонскиот шампион. По стартниот шок, ракометарите на Нексе ги консолидираа своите редови и настојуваа достојно да му парираат на домаќинот. На четири минути пред крај на полувремето, гостите изедначија на 13-13 и до крајот на првиот дел се играше гол за гол. Но, вардарци сепак, на одмор заминаа со гол предност (17-16).
Изедначено беше и на стартот од вториот дел. Хрватскиот тим во 36 минута преку Сакиќ дојде и до првото и единствено водство (20-21). Тоа беше сигнал, вардарци да ја стегнат одбраната и да го засилат темпото во нападот. Со четири гола во серија, „црвено-црните“ се одлепија (24-21) и комплетно ја презедоа контролата на играта и на резултатот. Вардар и во овој дуел потврди дека е далеку посилен противник од хрватскиот вицешампион и на крај рутински запиша уште една убедлива победа.
Хрватскиот интернационалец, Иван Чупиќ беше најефикасен во составот на Вардар со осум гола од кои пет ги постигна од седмерец. Шест гола запиша Тимур Дибиров, а по четири гола додадоа Хорхе Македа и Вуко Борозан. Извонредна партија на голот на „црвено-црните“ имаше Петар Ангелов со 15 одбрани. Кај Нексе прв стрелец беше Ведран Зрниќ со седум гола, а Перица Лелиќ заврши со 10 одбрани.
Во следниот натпревар во СЕХА лигата, Вардар на 5 февруари му гостува на Горење.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
