Вардар е можеби подмладен и наивен, но далеку од тоа дека е фудбалски неквалитетен. Тренерот Александар Васоски се труди повторно да создаде убав микс на младост и на искуство иако од клубот се одлејаа огромен број фудбалери, носители на играта од минатата сезона. Сепак, „црвено-црните“ славеа против Академија Пандев во Струмица и сега го посакуваат и скалпот на Силекс.
Кратовци не се „прославија“ во квалификациите за Лигата на шампионите, загубија со 4-0 од Карабах, но имаат компактен тим за македонски првенствени услови. Овој дуел дефинитивно го привлекува вниманието на домашната фудбалска јавност во неделната програма.
Ќе биде многу интересно и во Битола. Пелистер е повторно во елитата, а тимот на Зоран Штерјовски по два меча не знае за пораз. Сака да ја продолжи позитивната низа и против Работнички кој гостува под „Тумбе кафе“ по триумфот над Беласица. Многу млади фудбалери во двата тима, желни за докажување и за победа.
Струга Трим Лум двапати гостуваше во Тетово на стартот од првенството, извлече бод против Ренова, играше добро и против фаворитот Шкендија иако загуби, па тоа му дава за право на тренерот Срѓан Захариевски да размислува позитивно пред денешната пресметка со Борец. Велешани имаат четири бода по две кола и би сакале да останат непоразени и по денешното гостување во Струга.
ДВОЈКИ ПРВА ЛИГА, 3.КОЛО (17 ч.)
ВАРДАР- СИЛЕКС
ПЕЛИСТЕР – РАБОТНИЧКИ
СТРУГА ТЛ – БОРЕЦ
МАКЕДОНИЈА ЃП – ШКЕНДИЈА 0-1
РЕНОВА – АКАДЕМИЈА ПАНДЕВ 2-0
БЕЛАСИЦА – ШКУПИ 0-2
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА