Вардар заврши голема работа откако со победата над Мотор си го осигура пласманот во осминафиналето на две кола до крајот пред групната фаза од ЛШ. Сепак, пред „црвено-црните“ сега е нов предизвик, дуел на гостински терен против Порто кој претставува директна битка за петтото место, кое носи и нешто полесен ривал во осминафиналето.
Проблемите со кои се соочуваат „вардарци“ се огромни, но тренерот Алушовски е оптимист дека „црвено-црните“ ќе успеат да се стигнат до позитивен резултат.
„Победата против Мотор во претходното коло ја подигна атмосферата в тимот. Сепак не треба тој резултат да ни дава преголеми оптимистички очекувања. Реално гледаме на ситуацијата. Порто е фаворит сега на дуелот, а ние одиме без притисок и со единствена мисла – да играме, да се натпреваруваме и секако да ги искористиме шансите. Се обидуваме да не мислиме на проблемите, но најголем е тој што немаме доволно играчи за ротација, па ќе мораме да се потпреме на она што го имаме во моментов. Знам дека сите ќе се борат до крај, нема предавање – напротив ќе гледаме да бидеме на ниво со кое ќе можеме да се носиме со домаќинот”, вели Алушовски.
По заминувањето на Атман и Криштопанс, стручниот штаб на „вардарци“ има лимитирани опции на речиси сите позиции во тимот. Проблемот е уште поголем ако се знае дека во тимот ќе ги нема ниту Дисингер и голманот Кугис.
Натпреварот меѓу Порто и Вардар се игра в сабота со почеток во 16 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА