Војдан Стојановски експресно се наметна како лидер на По Ортез, откако македонскиот репрезентативец беше најзаслужен за уште една победа на својата екипа во францускиот шампионат. По Ортез вечерва лесно и убедливо го совлада тимот на Орлеан (82-60), меч во кој Стојановски со уште една брилијанта игра покажа дека заслужува да остане во овој тим до крајот на сезонава (договорот што го потпиша е со важност од два месеци).
Домашниот состав извонредно го почна натпреварот, ја доби првата четвртина со 22-9, а потоа го заврши полувремето со двојно повеќе поени од гостите (44-22). Потоа, преостанатите 20 минути беа рутина за Стојановски и соиграчите да ја забележат четвртата победа во последните пет кола од француското првенство.
Македонецот имаше свое шутерско шоу, погоди пет тројки од седум обиди и постигна вкупно 20 поени, надополнети со четири скока и три асистенции. Стојановски влегува во топ-форма, што дефинитивно е одлична вест и за нашиот национален тим, на еден месец до стартот на новиот квалификациски циклус.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
