Раџа Наинголан ги брои последните денови во дресот на Интер откако Белгиецот го избра клубот каде ќе ја продолжи кариерата. Во текот на вчерашниот ден беше најавено дека тој е многу блиску до Фиорентина, но Наинголан во последен момент се премисли и реши да потпише договор со Калјари. Ова всушност претставува камбек на белгискиот интернационалец во клубот од Сардинија, каде настапуваше од 2010 до 2014 година, пред да замине во Рома.
Постигнат е договор Наинголан следната сезона да ја мине на позајмица во дресот на Калјари, по што овој италијански прволигаш ќе има можност да го откупи неговиот договор со „нероаѕурите“, што е со важност до 2022 година. Белгиецот во текот на утрешниот ден ќе пристигне на лекарски прегледи, по што најдоцна до понеделник се очекува и неговата промоција во Калјари.
Наинголан заедно со Икарди беше отстранет од првиот тим на стартот од подготовките, со што јасно му беше ставено до знаење дека не е дел од плановите на новиот тренер Антонио Конте.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА