Академија ФМП стави крај на серијата од девет порази едно по друго во Првата кошаркарска лига откако на отварањето на 19. коло славеше на гостувањето кај Струмица со 94-99, забележувајќи ја четвртата победа во првенството која е од голема важност во битката за опстанок.
Двата тима влегоа расположено во натпреварот, а во првото полуврме проследено со одлична реализација на Струмица и Академија ФМП, струмичкиот и скопскиот тим одиграа во серии со кои го менува водството и ниеден тим не успеа да го наметне својот ритам и истиот да го задржи. По 10. минути игра на семафорот стоеше предност од 29-31 за гостите, предност од еден напад која „академиците“ ја задржаа и на полувремето за 54-55.
Струмица и Академија ФМП не продолжија во висок ритам и на отварањето на второто полувреме. Акцентот беше ставен на одбраната, а во овој сегмент подобар беше гостинот од Скопје кој го примора домаќинот на само еден реализиран обид за два поени па поведе со 67-74 пред одлучувачката четвртина. Во неа избраниците на Симиќ имаа и двоцифрена предност (79-89), но мотивираните домаќините не дозволија мирен финиш.
Обуквели започна серија на која и се приклучија и Сучов и Зетов па на две минути пред крајот на натпреварот домашниот тим беше на негатива од само еден напад (90-93). Струмица имаше и напад за изедначување, но младиот Зетов промаши во обидот зад линијата 6,75, а казната следеше од Коскоски на спротивната страна која ја искористи непоставената одбрана за лесни поени и предност од два напади за Академија ФМП која ја донесе четвртата победа на „академиците“ во сезоната.
Со 23 поени лидер на Струмица беше Сучов, а него го следеа Обуквелу со 19 поени и 12 скока и Димитриев со 17 поени и 6 скока. Смит ја предводеше Академија ФМП со 27 поени и 10 скока, 20 поени додаде Мариновиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
