Машката ракометна репрезентација на Македонија утре ќе ги дознае противниците во групата од прелиминарната фаза на СП 2019 што ќе се одржи во јануари, во Германија и во Данска. Со ждрепката во Копенхаген (утре, 12.30 ч.) ќе бидат одредени четирите групи со по шест репрезентации.
Две од прелиминарните групи (А и Б) ќе се играат во Германија, домаќини се Берлин и Минхен, а две (Ц и Д) се во Данска, во Хернинг и во Копенхаген. Првите три репрезентации од овие групи формираат нови две групи во главната фаза (Хернинг и Келн), а тие што ќе се пласираат од 4 до 6 место, ќе играат во Президент купот (Келн и Копенхаген). Полуфиналето ќе се игра во Хамбург, а финалето на СП ќе биде во Хернинг.
Организаторите ја искористија можноста да „сместат“ по една репрезентација во секоја група, а Северна и Јужна Кореја добија покана до ИХФ да настапат како обединета репрезентација и тие ќе бидат сместени во Групата А (Берлин) со Германија. Во групата Б во Минхен, организаторите ја сместија Хрватска. Во Групата Ц во Хернинг ќе игра Шведска, а во групата Д во Копенхаген носител е Данска.
Македонија е рангирана во третиот шешир заедно со Катар, Германија и Австрија што значи дека во првата фаза ги избегнуваме овие противници. Во полудиригираната ждрепка за Македонија отпаѓа групата А во Берлин бидејќи таму веќе се сместени Германците. Од она што останува како опција изборот пред ждрепката е на втората „германска“ група во Минхен и дуел со Хрватска предводена од Лино Червар.
„Според мене за нас локациски во првата фаза Германија е многу подобра варијанта од Данска. Тоа значи групата во Минхен и дуел со Хрватска, зошто да не!“ – вели голманот на македонската репрезентација, Борко Ристовски.
Според рангирањето на репрезентациите, носители во првиот шешир ќе бидат Франција, Шпанија, Шведска и Данска. Бидејќи Швеѓаните и Данците веќе се распределени, како опција за групата Б во Михнен остануваат светскиот првак Франција и европскиот Шпанија…
„Интересни носители, пред се. Според нашиот квалитет и амбициите, мислам дека од првиот шешир репрезентација против која имаме најголеми шанси е Данска. Можеби звучи чудно, но мислам дека од таа група на носители, Данците најмногу ни одговараат. Од вториот шешир, според моменталната форма и промените, веќе реков, ни одговара Хрватска, а може и Русија. Мислам дека имаме квалитет да победиме било која репрезентација од четвртиот и од петтиот шешир, но сепак, најповолни според мене се Србија и репрезентациите од Пан-Америка. Од шестиот шешир јас би ја избрал Ангола. Се кога ќе се собере и одземе, нашите амбиции и пласманот во многу ќе зависта од ждрепката и од среќата. Јас се надевам дека ќе погодам барем половина и дека во јануари ќе имаме уште едно успешно големо натпреварување за цела Македонија“ – посакува Борко Ристовски.
За македонската решрезентација ова ќе биде вкупно шести настап на светските првенста, трети во серија. На претходното СП 2017 во Франција, македонската репрезентација заврши на 15.место, а најдобриот пласман на ракометните Мундијали и единствен во Топ 10 во светот, го бележиме на СП 2015 во Катар на кое Македонија беше девета.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
