Црвена Звезда ја прекина серијата евролигашки порази откако вицешампионот на АБА по голема борба вечерва славеше над Баерн Минхен со резултат 74-68. Триумфот е уште позначаен ако се знае дека „црвено-белите“ во третата четвртина имаа негатива од 14 поени, но покажаа карактер, се вратија, и со неколку погодени клучни шутеви во финишот стигнаа до победата.
Мечот почна многу лошо за српскиот тим, кој инсистираше на шут од далечина, имаше 0/8 за тројка во првата четвртина, а Баерн поведе со 12-19. Гостите од Германија имаа целосна контрола над резултатот, на полувреме се замина со минимално водство на Баерн од 33-35, но избраниците на Пабло Ласо потоа одлично го почнаа третиот период и поведоа со 38-52. „Црвено-белите“ до крајот на четвртината намалија на шест поени разлика, потоа целосно се вратија, за со тројките на Теодосиќ и на Јаго да стигнат до огромен триумф.
Милош Теодосиќ одигра маестрален натпревар со 16 поени и 11 асистенции, двоцифрен беше и Лука Митровиќ со 11 поени, додека кај Баерн Минхен најефикасни во поразот беа Едвардс со 16 и Бонга и Болмаро со по 12 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
