Кога се игра „Ел Класико“, не само во Шпанија, туку и во целиот свет, ништо друго не е важно. Епската битка на шпанските гиганти Реал Мадрид и Барселона го обзема светот, а традицијата, ривалитетот, квалитетот и спектакуларноста сами по себе говорат за фудбалот што ќе биде понуден. Во моментов, Реал Мадрид е на врвот на табелата и има три бода предност пред Барселона, но и еден одигран натпревар помалку. Доколку „кралевите“ победат вечерва на „Сантијаго Бернабеу“, тогаш Барселона и дефинитивно ќе биде исфрлена од битката за титулата. Каталонците го имаат императивот за триумф, но доаѓаат во домот на „кралот“.
„Ел Класико“ е војна на световите. Во Шпанија, но и буквално во целиот свет, сите се поделени…Или си „кралски фан“, или си за Барселона…Трето – нема!
Многу важна улога во овие мегадуели имаат и тренерите. Двата клуба со години негуваат различни стилови на игра. Барселона во последната деценија ја игра познатата „тики-така“, топката оди од нога до нога, за нив е многу важен поседот на топката, а секако главната фигура е Лионел Меси. Неговата фудбалска магија многу често знаела да биде кобна за Реал Мадрид, а сега е во трио со Нејмар и со Луис Суарез, и тие делуваат едноставно незапирливо. На ова „Ел Класико“, Нејмар нема право на настап.
Барселона многу почесто пробива низ средината, посебно кога Лионел Меси ќе се извлече на десната страна во средниот ред и оттука го планира текот на акцијата на својот тим. Речиси секогаш пробива кон средината, а потоа со некој луциден потег проигрува кон Суарез или упатува шут кон голот. Многу поопасна е Барса од левата страна каде Жорди Алба редовно доаѓа во завршница и упатува центаршут.
Проблемот на Луис Енрике и на Барселона е што Андрес Иниеста, кој оваа сезона го мачат и повреди, веќе ја нема помошта на Чави. Поседот се уште е силна страна на Барселона, но веќе ја нема онаа брзина и прецизност во нивните додавања. Како слаби карики се означени Иван Ракитиќ и посебно Андре Гомеш, кои едноставно не се играчи од таков калибар.
За разлика од Барселона, стратегијата на Реал Мадрид е многу поконкретна. Имаат фудбалери во средниот ред кои умеат да ја задржат топката, Тони Крос и Лука Модриќ, но тренерот Зинедин Зидан бара таа брзо да биде пренесена напред, пред противничкиот гол. Тука на сцена стапува триото Роналдо – Бензема – Бејл, со својата брзина, луцидност, но и конкретност. „Кралевите“ во просек на натпревар упатуваат 18 шутеви кон голот на противникот, дури три повеќе од Барселона. Нападите најчесто одат по страничните позиции, а потоа топката се упатува во средината, каде Бензема и Роналдо чекаат завршница.
Многу голема улога играат и фудбалерите од страничните бековски позиции, Марсело и Карвахал. Со нив Реал Мадрид добива на ширина во нападот, и силно ја притиска противничката одбрана. Тука се создава вишокот, кој потоа во продолжение од акцијата и носи шанса за гол.
Реал Мадрид е посилен и во воздушната игра. Серхио Рамос е кралот на прекините, и тоа сигурно е една од главните предности на тимот на Зинедин Зидан. За вакви дерби – мечеви, може да биде и клучен фактор. Барселона нема силни скокачи, освен Жерар Пике, а меѓу „кралевите“ одлични во играта со глава се и Герет Бејл, Кристијано Роналдо и Карим Бензема.
Но, затоа пак, Луис Суарез и Лионел Меси се мајстори за игра на мал простор, со брза и едноставна акција да ја затресат мрежата…
„Ел Класико“ е војна на световите, но и војна на тактиките!
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
