Иако ја доби првата битка очигледно се уште не заврши целата „сапуница“ околу ситуацијата на Новак Ѓоковиќ во Австралија.
Првиот рекет на светот за првпат по стартот на целата приказна излезе со соопштение во кое ја образложи својата страна од случајот.
Во продолжение во целост ви го пренесуваме целото соопштение на Србинот.
„Би сакал да се обратам за континуираните дезинформации за моите активности и присуството на настани кои претходеа на мојот позитивен тест за коронавирус. Ова е дезинформација што мора да се негира, особено во интерес на ублажување на загриженоста на јавноста за мојот престој во Австралија, како и за разјаснување на работите кои се штетни и загрижувачки за моето семејство. Сакам да истакнам дека работев исклучително напорно за да ја осигурам безбедноста на сите, како и да се придржувам до тестирањето.
Присуствував на кошаркарски натпревар во Белград на 14 декември, по што се појави информација дека многу луѓе се позитивни на коронавирус. Иако немав симптоми на коронавирус, направив брз антиген тест на 16 декември, кој беше негативен, а како мерка на претпазливост направив и ПЦР тест истиот ден.
Следниот ден присуствував на тениски настан во Белград за да им поделам трофеи на децата и направив брз антигенски тест, кој беше негативен. Немав никакви симптоми, се чувствував добро и не бев известен за позитивниот ПЦР тест до крајот на тој настан.
Следниот ден, 18 декември, бев во мојот тениски центар во Белград за да ги исполнам обврските кон „Л’екип“ во форма на интервјуа и сликање. Ги откажав сите други обврски освен интервјуто за „Л’екип“.
Се чувствував должен да направам интервју за „Л’екип“ бидејќи не сакав да го изневерам новинарот, но се погрижив да ја задржам пропишаната дистанца и постојано носев маска, освен кога ме фотографираа.
Иако по интервјуто отидов дома за да се изолирам за потребниот период, кога ќе размислам сега, тоа беше грешка и прифаќам дека требаше да ја одложам таа обврска.
Што се однесува до деталите за патувањето, тие беа пополнети од мојот тим во мое име, што им го кажав на службениците за имиграција по пристигнувањето, а мојот агент искрено се извинува за административната грешка затоа што означи погрешна ставка за патувањето пред да пристигне во Австралија. Тоа беше човечка грешка и дефинитивно ненамерна. Живееме во предизвикувачки времиња, во глобална пандемија и понекогаш може да се случат грешки. Денеска, мојот тим обезбеди дополнителни информации до австралиската влада за да се разјасни ситуацијата.
И иако сметав дека е важно да се разјаснат дезинформациите, нема да давам дополнителни коментари од почит кон австралиската влада и нејзините власти и тековниот процес.
Секогаш е чест и привилегија да се игра на Австралија Опен. „Отвореното првенство на Австралија го сакаат играчите, навивачите и заедницата, не само во Викторија и Австралија, туку и ширум светот, а јас само сакам да имам можност да се борам со најдобрите тенисери во светот и да играм пред најдобрата публика во светот“, стои во соопштението на Ѓоковиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
