Престојот на Карим Хендави во таборот на Еурофарм Пелистер неочекувано се скрати за една година откако египетскиот голман се врати во татковината, и тоа како член на Замалек. Хендави бранеше одлично на голот на битолскиот клуб, се очекуваше тој да биде значаен адут во битката за трофеи во наредната сезона, но Замалек тргна во офанзива по Хендави, плаќајќи ја клаузулата за негово заминување од мак-ракометот.
Информацијата за заминувањето на Хендави ја потврди и раководството на Еурофарм Пелистер преку клупско соопштение.
РК Еурофарм Пелистер ја информира јавноста дека египетскиот клуб Замалек од Каиро ја откупи клаузулата од договорот на Карим Хендави, кој имаше потпишана соработка со нашиот клуб до јуни 2022 година. Хендави во февруари годинава дојде во Еурофарм Пелистер и настапи во вториот дел од сезоната 2021/22. Клубот е исклучително благодарен на професионалец како Хендави и му посакува многу успех во понатамошниот тек на кариерата. Благодарност и до клубот Замалек за професионалниот пристап при откупот на договорот“, се вели во соопштението на битолскиот клуб.
Еурофарм ексресно реагираше носејќи нов квалитетен голман во своите редови, откако денеска беше официјализиран трансферот на поранешниот голман на Веспрем, 31-годишниот Мартин Секељи.
„РК Еурофарм Пелистер соопштува дека нов член на нашиот клуб е унгарскиот репрезентативен голман, Мартон Секељи. 31-годишниот голман потпиша едногодишен договор и како и другите ракометари од ростерот на клубот, ќе се јави на првиот тренинг на 19 јули. Секељи минатата сезона ја мина во Порто, а претходно настапуваше за Балатонфуреди, Чурго, Татабања и Веспрем. За националната репрезентација собра 49 настапи. Во досегашниот дел на кариерата освои СЕХА Гаспром лига со Веспрем и двојна круна во Португалија со Порто. Беше прогласен за унгарски голман на годината во 2018 година. Клубот ќе го претстави по неговото пристигнување во Битола“, објави Еурофарм Пелисстер.
Раководството на битолчани го објасни заминувањето на Хендави, не криејќи го задоволството од ангажманот на Секељи како негова замена.
„Сакам да му се заблагодарам на Карим Хендави за професионалноста во периодот минат во нашиот клуб. Неговата желба беше останување во Битола и почитување на договорот и единствена грижа му беше недостатокот на едукација за неговите деца во нашиот град. Египетскиот гигант Замалек ја плати високата откупна клаузула и моравме веднаш да реагираме. Со ангажманот на Мартон Секељи доведовме искусен голман, репрезентативец и верувам дека ќе бидеме компетитивни на голманската позиција“, изјави директорот на Еурофарм Пелистер, Димитар Митревски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
