Раководството на Интер веќе стана свесно дека нема да може да го задржи Лаутаро Мартинез во летниот преоден рок, откако Аргентинецот одбива да потпише нов договор, а во постојниот договор има клаузула што му овозможува да си замине за сума од 110 милиони евра. Одличниот голгетер е голема желба на неговиот сонародник Лионел Меси, а челниците на Барса ќе сторат се за да го доведат Лаутаро на „Камп Ноу“.
Минатата седмица беше испратена и првата официјална понуда во висина од 70 милиони евра плус двајца фудбалери, Артуро Видал и Нелсон Семедо, но „нероаѕурите“ ќе настојуваат што подобро да го наплатат заминувањето на одличниот голгетер. Веќе е испратена и контрапонуда до каталонскиот гигант, Интер е задоволен со сумата од 70 милиони и од Видал, но Конте смета дека десниот бек Семедо не му е неопходен во тимот. Наместо него, Интер побарал двајца млади фудбалери, плејмејкерот Алења и дефанзивецот Тодибо, кои се на позајмица во други екипи, но кои според Конте би биле од сериозна помош на „нероаѕурите“.
Тешко е за верување дека Барса ќе се согласи тројцата фудбалери да ги процени на вкупно 40 милиони евра, но за очекување е преговорите да се интензивираат како што ќе се ближи крајот на сезонава. Бидејќи на каталонскиот гигант дефинитивно му е неопходно суперзасилување за нападот, а кога Меси ќе посака некого за соиграч – раководството вообичаено ги исполнува неговите желби.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
