Светското фудбалско првенство денеска го доживеа својот најголем шок во досегашниот тек од шампионатот, откако дебитантот Зеленортски острови успеа да извлече херојско реми без голови (0-0) против моќната Шпанија.
Натпреварот во Атланта донесе апсолутна доминација на поранешниот светски првак, но сите обиди на шпанските ѕвезди завршуваа во рацете на еден човек. Искусниот чувар на мрежата, Жозимар Жозе Евора Диас или во фудбалскиот свет познат под прекарот Возиња, одигра натпревар на кариерата и стана ноќна мора за фаворитот.
Возиња, чиј прекар во превод од португалски јазик симболично значи „тивок глас“, денеска зборуваше премногу гласно на теренот. Тој е жива легенда на својата репрезентација за која дебитираше уште во далечната 2012 година, а со денешниот настап само ја круниса својата долгогодишна верност кон националниот дрес, докажувајќи дека годините се само бројка кога се бранат боите на татковината.
Шпанските напаѓачи упатија дури 23 удари кон неговиот гол, но ниту силното темпо на игра ниту звучните имиња од составот на „црвената фурија“ не успеаја да ја скршат неговата концентрација. Со дури осум директни и спектакуларни одбрани, Возиња буквално ги фрустрираше противничките ѕвезди како Педри, Феран Торес и Микел Ојарзабал.
Животниот пат на Жозимар Жозе Евора Диас е приказна за огромна упорност и фудбалски номадски дух кој започнува во неговиот роден град Миндело на островот Сао Висенте. Уште од најмали нозе, инспириран од бразилскиот дефанзивец Жозимар од Светското првенство во 1986 година, тој сонувал да стане професионален фудбалер, иако градењето кариера од мала и изолирана африканска островска нација се чинело како невозможна мисија.
Неговата професионална кариера започнува во татковината во 2007 година во Батуке ФЦ, по што следува вистинско фудбалско патешествие низ светот: бранеше во Ангола (Прогресо), Молдавија (Зимбру Чисинау), Кипар (АЕЛ Лимасол), Словачка (Тренчин) и Португалија, каде што моментално настапува за тимот на ГД Шавес. И покрај тоа што целиот живот играше далеку од главните рефлектори на европскиот фудбал, Возиња никогаш не се откажа од својот сон, за на точно 40-годишна возраст да го дочека својот апсолутен врв на кариерата, деби на Светско првенство и партија на животот против моќната Шпанија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
