Париската полиција подготвува посебни мерки пред натпреварот меѓу Франција и Мароко кој вечерва се игра во четвртфиналето на Светското првенство 2026.
Градските власти на Париз се свесни дека главниот град повторно би можел да биде место на вандализам, како што беше случајот по големите успеси на фудбалскиот тим ПСЖ во Лигата на шампионите. Улиците на Париз тогаш буквално гореа.
Поради тоа полицијата подготвува специјална операција насочена кон спречување на потенцијални немири на улиците по натпреварот. Според извештаите, париската полиција ќе крене дронови еден час пред натпреварот, кои ќе патролираат одозгора и ќе испраќаат информации за можни инциденти.
Полицијата ги презема сите овие мерки, учејќи од искуството од 2022 година, кога, по победата на Франција над Мароко во полуфиналето на Светското првенство во Катар, беа уапсени 266 навивачи, од кои 167 беа од Париз.
Шанзелизе, кој беше епицентар на немирите за време на неодамнешните прослави на навивачите на ПСЖ, ќе биде под строга полициска контрола, а некои сопственици на продавници ќе ги заштитат своите продавници со штици како мерка на претпазливост против грабежи. Покрај тоа, властите наредија затворање на метро станиците најблиску до познатата авенија за да се избегнат големи толпи. Некои станици ќе бидат затворени цела ноќ.
Мароканската дијаспора брои речиси 300.000 жители во пошироката област на француската престолнина, што ги прави Мароканците една од најголемите имигрантски заедници во областа. Ако се бројат нивните деца и внуци родени во Франција, проценките за луѓето од мароканско потекло во парискиот регион честопати надминуваат 300.000-400.000 жители, но ова се само проценки бидејќи не постојат официјални етнички статистики.
Според податоците на француската влада, 2,2 милиони Мароканци живеат во целата земја.
Париската префектура го оцени натпреварот како високоризичен со цел да преземе мерки за спречување на понатамошни немири во текот на вечерта.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
